भारत र फिलिपिन्समा जारी जनयुद्धको समर्थनमा जुलाई महिनाभरि अन्तर्राष्ट्रिय अभियान चलाइने

भारत र फिलिपिन्समा क्रान्तिका शहीदहरूको सम्मानमा, साथै राजनीतिक कैदीहरूको स्वतन्त्रताको लागि र भारत र फिलिपिन्समा भइरहेको जनयुद्धको समर्थनमा अन्तर्राष्ट्रिय अभियानको लागि ‘भारतमा जनयुद्धको समर्थनका लागि अन्तर्राष्ट्रिय समिति’ले एक अपिल जारी गरेको छ ।

भारतको जनयुद्धलाई समर्थन गर्ने अन्तर्राष्ट्रिय समितिले भारत र फिलिपिन्समा क्रान्तिका शहीदहरूको सम्मानमा, राजनीतिक बन्दीहरूको स्वतन्त्रताका लागि र भारत र फिलिपिन्समा भइरहेको गौरवशाली जनयुद्धको समर्थनमा जुलाई १ देखि अन्तर्राष्ट्रिय अभियानमा सक्रिय सहभागिता जनाउन सम्पूर्ण विश्व सर्वहारा वर्ग, क्रान्तिकारी र जनवादी सङ्गठनहरूलाई आह्वान गरेको छ ।

अपिलमा भनिएको छ, “१ जुलाई २०१० का दिन कमरेड आजादलाई नागपुर शहरमा अपहरण गरियो, त्यहाँबाट उनलाई भारतको आन्ध्र प्रदेश राज्यको आदिलाबाद जिल्लामा लगेर महाराष्ट्र नजिकै लगियो र त्यहाँ उनको निर्मम हत्या गरियो। कमरेड आजादको काम भारतका आदिवासी, दलित, किसान र मजदुरका लागि मात्र महत्वपूर्ण थिएन, तर उनको क्रान्तिकारी छाप विश्वभरका विवेकशील सर्वहारावर्गमा विद्यमान छ । सर्वहारावर्गको अग्रदस्ताविरुद्ध भारतीय राज्यसत्ताले गरेका अपराधहरू कहिल्यै बिर्सने छैनन् ।”

भाकपा (माओवादी) का नेता कमरेड आजादको हत्या गरिएको सन्दर्भ र भारतमा जस्तै फिलिपिन्समा पनि कामरेड कालान र का. बागोङ ताओलाई फिलिपिन्सको बुर्जुवा राज्यले अपहरण गरी मारेको सन्दर्भलाई जोडेर अभियानले जुलाई महिनाभरि अभियान सञ्चालन गर्न लागेको हो ।

अपिलमा भनिएको छ, “जुलाई १ देखि जुलाई २८ सम्म (शहीदहरूको सप्ताहसम्म) हामी प्रत्येक घटनाको राष्ट्रिय र स्थानीय अवस्था अनुसार दूतावास, वाणिज्य दूतावास र अन्य यस्तै राष्ट्रिय तथा अन्तर्राष्ट्रिय संस्थाहरू नजिक सबै प्रकारका बैठकहरू, कार्यहरूको लागि आह्वान गर्दछौं, साथै कारखानाहरू, लोकप्रिय छिमेकहरू, विश्वविद्यालयहरू, संघसंस्थाहरू र सामाजिक केन्द्रहरूमा सबै प्रकारका जुझारु पहलहरूको अपेक्षा गर्दछौं । जसले राजनीतिक कैदीहरू र जनयुद्धप्रति हाम्रो सर्वहारा ऐक्यबद्धतालाई सूचित र प्रदर्शन गरोस् । भारत र फिलिपिन्समा भएको युद्धका साथै विश्व सर्वहारा क्रान्तिका सबै शहीदहरूप्रति हाम्रो हार्दिक श्रद्धाञ्जली !”

अपिलमा ‘क्रान्तिका शहीदहरू कहिल्यै बिर्सने छैनन्, शहीदहरू विश्व सर्वहारा क्रान्तिको रातो झण्डा हुन्, भारत र फिलिपिन्सका सबै राजनीतिक कैदीहरूलाई तत्काल रिहा गर, भारतीय जनयुद्ध जिन्दावाद, फिपिन्सीय जनयुद्ध जिन्दावाद’ लगायतका नाराहरु उल्लेख गरिएको छ ।

प्रकाशित मिति : २०८० असार १३ गते बुधवार
प्रतिक्रिया दिनुहोस